حريف الحروف لعبة شغالين عليها من سنة تقريبا. اللعبة مكونة من أربع ألعاب سريعة، بتستخدم حروف اللغة العربية علشان تعمل كلمات وتألف قصص وقصائد شعر، وكمان تخمن حيوانات وأفلام وأكلات وحاجات تانية بتبدأ بحرف معين.

 

دي شوية حاجات  اتعلمناها في الطريق.

 

برغم إن اللعبة في الأصل مش لعبة تعليمية لكننا شوفنا إن الناس وهم بيلعبوا بيتسألوا إزاي كلمات معينة بتتكتب أو بيتناقشوا في المعاني المختلفة لنفس الكلمة، وناس تانية بتسمع كلمات لأول مرة في حياتهم بالـذات لو أجيال مختلفة بتلعب مع بعض.

 

في حين إن العربي لغتنا الأولى لقينا إننا نعرف عنها قليل جدا. فمثلا في أوقات كتير بنلاقي نفسنا مش عارفين ازاي نكتب كلمات بنستخدمها كل يوم.

 

محاولة الوصول لمُصنّعين زهر في مصر كانت زي محاولة البحث عن لبن العصفور. غريبة صح؟ لان على كل قهوة في الشارع بنشوف ناس بتلعب طاولة والزهر جزء من ثقافتنا، ومع ذلك رحلة البحث أخدت وقت طويل جدا.

 

لغتنا معبرة جدا، بس للأسف إحنا فقدنا علاقتنا بيها، فأصبح صعب علينا نعبر عن نفسنا باللغة العربية. حريف الحروف محاولة لكسر إحساسنا إن العربي لغة جد ورسمية ومش ممكن نلعب بيها. نفسنا إن اللعبة ده تقوي علاقة كل اللي بيتكلموا عربي بلغتهم الجميلة.