أنشطة

تجاربنا التعليمية الخرافية


"نحن لا نكون أحياءً بشكل كامل، أو نكون على سجيتنا تمامًا، أو ننهمك بعمق في أي فعل بقدر ما نفعل حين نلعب"؛ تشارلز إي شيفر.

معرفة المزيد

يا أيها الكبار، والأطفال، وجميع الكائنات!

احنا بنخلق بيئة بتتيح للّاعبين انهم يستكشفوا إمكانيات عقولهم في نفس الوقت اللي بيحققوا فيه رغبتهم الفطرية في اللعب. بفتح المجال للاستكشاف عن طريق اللعب يقدر اللاعب إنه يتحدى الرتابة والأفكار النمطية بشكل مبدع، ويخوض رحلة التمكين الذهني.

الوسائط والطرق المتنوعة اللي بيستخدمها مكّوك بيتم اختيارها دايما بعناية عند صياغة كل جلسة، ولكن العنصر الجوهري دايما هو احتواء ورش العمل على عناصر التعبير عن الذات واللعب.

سحر مكوك

للتجارب التعليمية


احنا مؤمنين بإن السحر بيكمن في قدرتنا على الانخراط في اللعب. وبنؤمن برحلة كل شخص تجاه التعلم الذاتي، وإمكانية تفكيك اللي اتعلمه سابقا وإعادة تعلمه، لإن كل رحلة من الرحلات دي فعلًا مهمة. إحنا بنؤمن كمان في قوة التساؤل والحوار خلال كل رحلة استكشافية.

اعرف منهجيتنا

المنظمات

المنظمات غير الحكومية، المدارس، الشركات، المعسكرات والمراكز الاجتماعية!

المنظمات

مكّوك بيهدف كمان لأنه يصيغ فعاليات لعب، ويطَوَّع محتواه علشان يتناسب مع جماهير مختلفة. احنا بنشتغل مع كل أنواع المؤسسات (سواءً كانت هادفة للربح أو غير هادفة للربح)، وبيشتغل كمان مع مُختَلَف المعلمين (سواء في معسكرات، أو مدارس، أو مراكز اجتماعية). ممكن نزوركم، ونصيغ ألعابنا علشان تتناسب مع المساحة بتاعتكم على حسب ما تحتاجوا. احنا بنطور المحتوى اللي حابين توصلوه، وبنقدمه بما يتناسب مع جمهوركم.

دورة

برنامج كامل بيمتد على مدار جلسات متعددة. بيستخدم البرنامج رحلة التعلُّم لتمكين المشاركين انهم يعلّموا نفسم بنفسم، ويستكشفوا اللي بيحبوه واللي بيثير فضولهم، بالإضافة لاكتساب المهارات اللازمة للعمل في إطار جماعي.

يوم واحد

نموذج من اللعب الجماعي يحتوي على ديناميكيات لعب مختلفة تعتمد على عدد اللاعبين. مدة كل جلسة من ساعتين لـ٣ ساعات بيتضمنها أنشطة كسر جليد بالإضافة لمناقشة ختامية. بيتم من خلال الأسلوب ده تحفيز فضول اللاعبين وكمان خلق فرصة ليهم للتدرب على التفكير النقدي والتعبير عن الذات في سياق لعبة جماعية.

كام ساعة

تجربة على الماشي تم تصميمها وتطويرها مخصوص علشان تتناسب مع الفاعليات السريعة زي الأسواق، والكارنافالات، أو مثيلها من الفاعليات. خلال التجارب اللي من النوع ده بيتم ممارسة أنشطة ليها نمط متحرك وسريع بتثير فضول الأطفال وبتوفرلهم معلومات وفرصة للاستمتاع واللعب.

الموضوعات والبرامج

بلدنا
ثقافة السلام
الاستدامة
الفنون والثقافة
العلوم والعقول المُبتكِرة

بلدنا هو عبارة عن لعبة لوحية تعليمية بالعربي بتدعو اللاعبين انهم يستكشفوا مفهوم الثقافة عن طريق السفر عبر المناطق المختلفة في مصر على لوحة اللعب. في كل منطقة من مناطق اللوحة، بتقدم اللعبة لكل مشارك مفاهيم مختلفة وبتسأله أسئلة مختلفة عن الجغرافيا، واللغة، والبشر، والطعام، والحيوانات، والبيئة، والموسيقى، والعادات، والحرف، والآثار، والموارد الطبيعية بالإضافة للتحديات الخاصة بالمنطقة. بيتم سؤال الأسئلة المختلفة بشكل غير مباشر من غير افتراض أي معرفة سابقة بموضوع الأسئلة، ولكن بيتم استخدام أساليب مختلفة لتحفيز التفكير النقدي، وتكوين وجهة نظر، أو مهارة فنية زي الرسم أو التمثيل. اللعبة دي هي عبارة عن رحلة استكشاف لمعلومات جديدة، مع التفكير في معناها واستخدامها في سياق جديد.

ازاي ممكن نتعايش مع أنفسنا ومع الآخرين؟

التعاون، والتواصل، وتخطي النزاعات، وتقدير التنوع هم جوهر التجربة اللي بيقدمها النشاط ده. تعليم السلام بيعرّض المشاركين لبيئات بيستكشفوا فيها وجهات نظر وسلوكيات مهمة جدًا في ظل المجتمع المستقطب اللي بنعيش فيه، علشان نمكنهم إنهم يتبنوا بأنفسم التغيير الإيجابي اللي نفسنا نشوفه في العالم.

ازاي ممكن نخلق نماذج لأنظمة حيّة، مستوحاة من الأنظمة الحيّة الموجودة بالفعل على كوكب الأرض؟

التجربة دي هي نظرة على كوكبنا وطبيعته الغنية، وبتفتح عينينا على كيفية التواصل معاه. عن طريق اللعب والإرشادات البصرية بنستكشف البيئة المحيطة بينا، بالإضافة لمشاكل بيئية مختلفة. من خلال النشاط ده بنقدم للأطفال اللي يساعدهم على انهم يكونوا الجيل اللي حيوجد الحل لمشاكل البيئة، وده عن طريق معلومات وأساليب لإعادة تدوير المخلفات واستخدامها بشكل أفضل.

ازاي ممكن نبتكر بشكل فردي وجماعي عن طريق التعبير الفني؟

طول ما احنا ماشيين في الحياة بنرقص، وكل يوم بنحكي قصص مالهاش عدد. مكّوك بيخلق مساحات لتوثيق التعبير المبتكر فرديًا وجماعيًا، وبيستخدم الوسائط الفنية لاستكشاف الموضوعات اللي بيقدمها.

ازاي ممكن نفهم ونستخدم الطُرق العلمية؟

مكّوك بيؤكد على ضرورة التفكير في كيفيّة التفكير؛ بنلعب ألعاب لتنشيط الذهن بتحفز الإبداع والتفكير الابتكاري. بتحاول عقولنا دايما إنها تفك شفرة العالم من حوالينا باستخدام الكلمات، والمعادلات، والأرقام. بنستكشف العلوم المختلفة وتطبيقاتها في حياتنا عن طريق الانخراط في تجارب وخبرات متنوعة.

صانعي الألعاب


قابلنا بالصدفة مجموعة من ميسرين الأنشطة اللي دمهم خفيف في البعد الزماني المكاني الجديد. اتعرَّف عليهم!

أعرفنا أكثر

علي

علي هو مهندس على الورق، ولكن في الواقع هو بيشتغل في المجال الاجتماعي طوال العشر سنين اللي فاتت. علي اشتغل كتير مع الأطفال في مصر ، بالإضافة لبعض الدول التانية الموجودة في كواكب مختلفة. بيمتد شغل علي ما بين تصميم تجارب تعليمية، وتصميم ألعاب وتيسير أنشطة في جميع أنحاء الكون. علي هو أحد المشاركين في إنشاء مكّوك، وهو كمان واحد من الخبراء التعليميين هناك.

روان

روان صحفية متخصصة في الثقافة والفن، وبتشتغل بوسائط مختلفة زي الكتابة، والفوتوغرافيا، والفيديو. إلى جانب عملها في مجال الصحافة روان بتشترك في مشروعات مختلفة في مجالات الثقافة، والتعليم البديل، والتنمية الاجتماعية. روان عندها خبرة كبيرة كمدربة، ومُيسِّرة، ومنظمة لأنشطة تعليمية غير تقليدية في مصر وبلدان تانية على كوكب الأرض، بالإضافة لأماكن تانية عبر المجرات المختلفة. روان من أشد المعجبين بمقولة (كونفوشيوس) "أنا أسمع شيئًا ثم أنساه، أنا أرى شيئًا فأتذكره، أنا أفعل شيئًا فيزداد فهمي للأشياء".

كريم

كريم هو صديق لمكّوك، درس الصيدلة واشتغل لفترة في مجال الصناعات الدوائية على كوكب الأرض. بعد حادث سقوط زخات من النيازك قرر كريم إنه يبدأ رحلة ممارسة الأنشطة اللي بيحبها؛ وده بيتضمن الشغل مع الأطفال ومجتمعات اللاجئين. اشتغل كريم كمان قبل كده كمُروِّج للممارسات الصحية وكمُيسِّر أنشطة مع أطفال اللاجئين، وحاليا هو بيشتغل مع مفوضية شؤون اللاجئين في وحدة الحماية، بالإضافة لكونه كمان عضو في فريق عمل (ميني-مدينة). في وقت فراغة بيحاول كريم استكشاف كواكب أخرى، وهو مؤمن بإن "عملية التعلم تكون أكثر فاعلية حين ترتبط بالفعل، وهي تحدث تلقائيًا حين ننخرط في فعل ما، وحين نستخدم أذهاننا وأجسادنا على حد سواء، وحين نتخيل ونخلق، وحين نلعب ونستمتع".

مو

مو الشهير بـ (حمامة) هو موسيقار، ومنظم مهرجانات، ومنتج فني، وعمومًا بيتمتع بقدرة مبهرة على خلق أجواء ممتعة وشيقة. مو شارك في تأسيس مهرجان أشطورة مع مجموعة من أصدقائه؛ وكان المهرجان بيجمع مواهب كتيرة من مجالات مختلفة في موقع من مواقع صحراء مصر. مو من المهتمين بالطيور، واشتغل في مجال حماية البيئة قبل كده، وده السبب في اهتمامه بنشر حبه للطبيعة وسط كل الناس اللي بيقابلهم.

نيرفان

نيرفان هي مؤسسة مشروع (ورقات)، وهي واحدة من سكان كوكب المريخ. اشتغلت نيرفان كمتطوعة بالإضافة لشغلها كميسرة أنشطة في العديد من المعسكرات الصيفية والمراكز الفنية عبر المجرات المختلفة. نيرفان بتحب تستخدم أسلوب الأوريجامي لتبسيط الحقائق الرياضية والهندسية للطلاب الفضائيين اللي بيشاركوا في أنشطتها أو بيحضروا الورش اللي بتيسَّرها. "أنا بحب كل حاجة مصنوعة يدويًا. استكشاف حاجات جديدة مع الأطفال، والسفر عبر المجرات، ولعب التنس هم أكتر ٣ حاجات بحبها".

نايري

نايري عبد الشافي هي ناشطة اجتماعية حماسية، بتسكن على كوكب المشترى. نايري عندها شغف بالخدمة الاجتماعية والعمل المجتمعي. اشتغلت قبل كده وتطوعت بالعمل في مشروعات تعليم غير نظامي، ومشاريع تبادل ثقافي مع أطفال وشباب وبالغين، وفي وسط مجتمعات اللاجئين في أكتر من ٣ قارات عبر المجرات المختلفة. نايري بتحب الأكل، وبتحب تسافر حوالين درب اللبانة، وبتؤمن بإن "في العالم الديناميكي سريع الوتيرة اللي بنعيش فيه بنحتاج نفكر أنفسنا إننا نستقطع لحظات نتأمل فيها التجارب، والمعارف، والمهارات والسلوكيات اللي بنكتسبها طول رحلتنا في الحياة، ونحاول نفهم تأثير الحاجات الصغيرة اللي بتفرق في رحلتنا تجاه تعلم المزيد؛ يعني نتأمل أهمية الاستمتاع باللي بنعمله في بيئة آمنة بنتمتع فيها بالحرية وبتتوفر لنا فيها الرعاية اللازمة لنمو عقولنا، وأجسامنا، وأرواحنا، وأهمية المساحة اللي بتحفزنا على التساؤل، والشعور بالآخرين، واستكشاف الجديد. بالنسبالي مساحة زي دي بتتخلق عن طريق اللعب".

فريدة

فريدة هي خبيرة ناشئة في التنمية الاقتصادية، بالإضافة لشغفها بالتعليم غير النظامي. خلال السنوات الخمسة الأخيرة، اشتغلت فريدة كميسِّرة لأنواع مختلفة من ورش العمل، والندوات، والورش التدريبية بخصوص موضوعات التنوع، وبناء فريق العمل، والتبادل الثقافي في مجرات مختلفة حوالين المجموعة الشمسية. فريدة بتؤمن بإن "دايمًا أنجح الناس هو الشخص المبدع اللي بيحب اللعب". فريدة في أوقات فراغها بتحب القراية، والمشي على الحبل، والألعاب اللوحية.