عننا - makouk

قصتنا

العالم في حالة تغيُّر، وتحول، ونمو، ولعب مستمر. عشان كده لازم احنا كمان نلعب!


ياللي بتلِف الفضاء علشان تستكشف عوالم تانية خارج عالمنا. سفينتك الفضائية نزلت في أرض المغامرات السحرية المجهولة… الأرض دي أصبحت بيتك، وفيها السحر واللعب في انتظارك.

معرفة المزيد

ياللي بتلِف الفضاء علشان تستكشف عوالم تانية خارج عالمنا. سفينتك الفضائية نزلت في أرض المغامرات السحرية المجهولة… الأرض دي أصبحت بيتك، وفيها السحر واللعب في انتظارك. خدنا معاك يا مكّوك في رحلة شيّقة لكوكبك السحري. عبر المجرات المختلفة بتبدأ طرقنا تتفرّق، وبننسى أهمية اللعب خلال حياتنا اليومية. وعشان نقدر نواصل الحياة لازم بجانب الالتزامات، والمدارس، والجدية، نقدَّر قيمة اللعب في حياتنا ونعتز بيها. بغض النظر عن كل تفاصيل حياتنا، اللعب .والرغبة في الاستكشاف والتساؤل والنمو والتعلُّم بالطرق المختلفة هم جزء لا يتجزأ من كل واحد فينا

بيئتنا
الفنون والثقافة
تعليم السلام
العلوم والإبتكار

 

مكّوك بيهدف إنه يسافر -عن طريق اللعب- في رحلات يستكشف من خلالها أسئلة، وموضوعات، وعناصر مختلفة بتأثر علينا وعلى العالم اللي بنعيش فيه. مكّوك بيقدم أنشطة ممتعة؛ ممكن من خلالها استكشاف الفنون والثقافة، والبيئة، وتعليم السلام، والعلوم، والإبداع. سواء من خلال لعبة، أو تجربة، أوبرنامج تعليمي، مكّوك هو باب مفتوح على أشكال لا حصر لها من المرح واللعب بيجمَّع عن طريقها الأصحاب، والأطفال، والكبار، والكائنات كلها، وبيقدم للجميع إمكانية التعبير عن أنفسهم بشكل تلقائي، وبيقدملهم كمان فرصة للتساؤل والاستكشاف. لو كنت حاسس بالملل، وحابب تكسر الروتين اللي في حياتك، تقدر تلعب لعبة من ألعاب مكّوك، أو ممكن تلجأ له علشان يساعدك في خلق تجربة مرحة، أو برنامج تعليمي، تقدر من خلاله تسافر لعوالم جديدة ممكن تحب تستكشف جوانبها المختلفة. عالم اللعب بمجراته المختلفة في انتظاركم، تعالوا وانضمولنا نلعب سوا!

نظرية اللعب


بشكل عام، كلنا بنشترك في رغبتنا الداخلية في اللعب.

اعرف منهجيتنا

 بالرغم من كده خلقت الثقافة الحديثة نظرة تجاه اللعب على إنه نشاط غير جاد أو مضيعة للوقت. حتى في اللغة العربية الحديثة بيتم ترجمة كلمة ’لعب’ لـ’عبث’ أو’لهو’ مع تجاهل تام لقيمته الاجتماعية، والثقافية، والتنموية. وبالتالي أبعدت النظرة دي البشر عن أفعالهم الفطرية المتعلقة بحب اللعب. في الواقع العلم بيؤكد على فوائد اللعب -مش بس بالنسبة للأطفال- لكل البشر. أثبتت أشكال متنوعة من اللعب مساهمتها في تحسين ملكات الإدراك، وتطوير المهارات الاجتماعية، والذهنية، والعاطفية. لما بننخرط في اللعب بنخَرَّج طبيعتنا الحقيقية، وبنستكشف علاقتنا بنفسنا وبنتفاعل معاها ومع العالم من حوالينا.

مركز الموارد


مركز الموارد

ابتداءًا من (ولادنا)، ووصولًا إلى (مكّوك) لقينا مصادر كتيرة للإلهام، ومعلومات طورت اهتمامنا بأهمية اللعب. دَعَّم هدفنا ده إطِّلاعنا على العديد من أعمال وأفكار المبدعين، والفلاسفة، والعلماء. وعشان نرضي فضولكم تجاه نظرية اللعب عملنا قائمة بأعمال ومواد معرفية ممكن تحبوا تتطلعوا عليها.

المكّوكيّون


معرفة المزيد

علي

علي هو مهندس على الورق، ولكن في الواقع هو بيشتغل في المجال الاجتماعي طول العشر سنين اللي فاتت. علي اشتغل كتير مع الأطفال في مصر على كوكب الأرض، بالإضافة لبعض الدول التانية في كواكب مختلفة. بيمتد شغل علي ما بين تصميم تجارب تعليمية، وتصميم ألعاب وتيسير أنشطة في جميع أنحاء الكون. علي هو أحد المشاركين في إنشاء مكّوك، وهو كمان واحد من الخبراء التعليميين هناك. علي مؤمن بمقولة مارتن لوثر كينج “يتوجب على من يحبون السلام السعي لتنظيم أنفسهم بنفس الفاعلية التي ينظم بها محبي الحرب أنفسهم”.

فاطمة

فاطمة هي واحدة من سكان كوكب نبتون، اتخرجت من المدرسة الألمانية بالقاهرة على كوكب الأرض، وبعدها درست إدارة أعمال وحصلت على شهادة الماجستير في إدارة الأعمال في الجامعة الأمريكية بالقاهرة. بإلهام من تجربتها مع أولادها، وبسبب إحباطها من انفصالهم عن العالم المحيط بيهم، ونقص المنتجات الترفيهية الموجهة لسنهم شاركت في إنشاء شركة (ولادنا) سنة ٢٠١٢. بعد مرور ٤ سنين اكتشفت فاطمة وأصدقائها اللي بتشتغل معاهم إن الكبار كمان عايشين مع الأطفال على كوكب الأرض؛ وإن فيه كائنات وأصدقاء تانيين عبر المجرات المختلفة نفسهم يلعبوا. بالتالي عشان تلبي رغبتهم وتضمهم لدايرتها حوِّلت (ولادنا) لـ (مكّوك) اللي يعتبر مكان للاستكشاف والمشاركة في اللعب، والترحيب بالعالم وما وراء العالم.

آية

آية مصممة ألعاب وطالبة بتدرس فنون بصرية وكانت مهندسة في السابق. اتعلمت منزليًا مع جدتها وكملت تعليم نفسها بنفسها عشان كدا هي بتؤمن بإن التعليم ممكن يحصل في أي وقت وأي مكان. بتقرأ وبتعلب ألعاب كتير وبتعتقد في إن الألعاب بتدينا أكتر من حياة نعيشها وتجارب كتير نتعلم منها. آية بتحب السفر والسباحة ومهتمة بعلم الأجتماع والبيئة والتاريخ.

ساندرا

تلعب ساندرا ادوارد أدوار مختلفة في المجال الثقافي بين مبادرات فنية وتعليمية، حيث تعكس اهتمامها بتشكيل وتطبيق نظم إدارية تشاركية فعالة ومرنة. خلال السنوات الماضية، عملت ساندرا في وظائف مختلفة مع مركز الصورة المعاصرة، ومؤسسة أنا ليند والمورد الثقافي. تعمل كمديرة البرامج  في شركة مكوك.

المتعاونين والداعمون


معرفة المزيد

برنامج سينرجوس

اختار برنامج (سينرجوس) (ولادنا) ضمن المبدعين الاجتماعيين في العالم العربي في سياق البرنامج اللي أطلقوه من سنة ٢٠٠٨ لـ ٢٠١٥. قدم (سينرجوس) من خلال البرنامج المذكور دعم وتعاون لأكتر من ٥٠ مشروع -في منطقة الشرق الأوسط وشمال أفريقيا- من المشروعات اللي بتعتبر رائدة في إحداث التغيير المجتمعي وفي تقديم أساليب وحلول متفردة لمواجهة المشاكل الاجتماعية والاقتصادية المختلفة.

إنديفور

سنة ٢٠١٣ أصبحت (ولادنا) واحدة من زملاء (إنديفور مصر)؛ وهي منظمة غير هادفة للربح هدفها دعم الشركات الريادية

إنباكت

مبادرون مصر (مبادرون مصر ٢٠١٣): تم اختيار (مكّوك) من قِبَل (سينرجوس) ضمن برنامج (مبادرون مصر)، اللي بيدعم أصحاب المشاريع الاجتماعية الكبيرة والصغيرة، والمتطوعين من الشباب؛ مش بس تقنيًا وماديًا، ولكن عن طريق تقديم الإرشاد والتشبيك بالعاملين في نفس المجال وبالشبكة الإقليمية.

برنامج الأمم المتحدة الإنمائي (زمالة جيم تشينجر ٢٠١٥)

تم اختيار علي عزمي من ضمن فريق مكّوك كواحد من خمس مبتكرين من مصر، وده علشان يشارك في زمالة برنامج الأمم المتحدة الإنمائي اللي بيهدف لدعم ودفع القيادة والابتكار فيما يخص استخدام الألعاب لإحداث التغيير المجتمعي. البرنامج مدته سنة واحدة، بالاشتراك مع إنجيجمنت لاب، وكلية إمرسون في بوسطن بالولايات المتحدة الأمريكية

مشروع ذا وِل بيينج - ٢٠١٦

تم إنشاء المشروع سنة ٢٠١٤ ما بين منظمة أشوكا، ومعهد إيسالين، ومعهد فتزر، وسينرجوس. بيسعى المشروع لدعم رخاء قادة التغيير الاجتماعي، وده عن طريق الدعم القوي والفعال لأصحاب المشروعات المجتمعية، واللي بيؤدي بدوره إلى تحسين حياة الأشخاص اللي بتتوجهلهم جهود محدثي التغيير.

البنك الأوروبي لإعادة الإعمار والتنمية - برنامج دعم سيدات الأعمال

بيسعى برنامج دعم سيدات الأعمال لتقوية دور المرأة رائدة الأعمال في الاقتصاد المصري. أطلق البرنامج ده البنك الأوروبي لإعادة الإعمار والتنمية بالشراكة مع البنك الأهلي المصري بهدف توفير حزمة شاملة من الدعم المادي والتقني لسيدات مصريات في طور تأسيسهم أو توسيعهم لشركاتهم.

مصريتي

بتسعى مؤسسة مصريتي إنها تدعم الحياة المسالمة والتسامح في مجتمعنا. من ضمن المباديء اللي بتسعى مصريتي لتحقيقها السلام في معناه الشامل، والتنوع الثقافي، وإشراك الجميع. مصريتي هي مؤسسة صديقة لـ مكّوك، وشريك في إبداع أول نسخة من لعبة بلدنا.

أشطورة

هو مهرجان موسيقى وفنون، وهو مبادرة وتجربة تشاركية جماعية. مكّوك صمم ونفذ الأنشطة الترفيهية لدورة المهرجان لعام ٢٠١٦، وكمان اخترع لعبة شارك فيها الجميع طول فترة المهرجان.

الجامعة الأمريكية بالقاهرة

بيستمتع مكّوك بزيارة معمل التفكير الإبداعي في الجامعة الأمريكية، اللي بيقدم فيه الإرشاد لطلبة المدارس الثانوية، بالإضافة لإعادة صياغة الشروح العلمية والألعاب.

مجاورة / الآثار لينا

هي صديقة لـ مكّوك في العديد من المشروعات التشاركية. من بين المشروعات المتنوعة اللي تم التعاون فيها ما بين مكّوك ومجاورة ورش عمل كان موضوعها كيفية أرشفة التراث وكانت موجهة لأطفال سوريين لاجئين، بالإضافة لتيسير أنشطة متحفية ثقافية للأطفال.

دايمة

دايمة من المصادر الرئيسية اللي بنرجع لها لما نشتغل على محتوى متعلق بالجيولوجية أو الأحياء. وعشان إحنا ودايمة مهتمين بالبيئة وأحولها شغالين دلوقتي معاهم على لعبة تعليمية بيئية.