التغيير جزء طبيعي في عمر أي شركة.

جزء ضروري لكن صعب..

زي مثلا الزواحف لما بتغيير جلدها .. العملية مش مريحة وبتسحب كم كبير من الطاقة لكنها منعشة.

إحنا بنكبر وشركتنا بتكبر معانا وبالتالي التغيير لو دل على حاجة يدل على نضجنا، وعلى إننا فاهمين شركتنا أكتر وإيه اللي بتتضمنه. عاوزين نحاول نفهم ليه التجربة دي كانت صعبة علينا وكمان نحط كل النقط اللى اتعلمنها هنا علشان نشركم في تجربتنا.

١.  خد بالك من العواطف

لما تكون معتبر إن مشروعك هو طفلك صعب أوي تغيير فيه! حتى لو انت عارف ومتأكد إن الوقت حان! لو فكرت بعقلك هتشوف إن التغيير منطقي وضروري بس المشكلة لما تفكر بقلبك هتلاقي نفسك بترفضه. خليك متأكد إن العواطف دي هتكون موجودة على طول مهما حولت تستخدم المنطق. الوعي بالموضوع ده في حد ذاته بيوضح ردود فعلك وتصرفاتك انت وشركائك وقت التغيير.

أيوه! الإنسان بيكون عاطفي لما الموضوع يتعلق بتجربة تخصه!

٢.  المشاركة في خلق تجربتك

إحنا شركة مقتنعة إن خلق أي شيء لازم يتم بالتشارك والشغل الجماعي فلما قررنا نغيير من نفسنا استخدمنا نفس المنهجية. عزمنا أصحابنا وأصحاب أصحابنا مرة والتانية علشان يشاركونا الرحلة. وكانوا بستمرار بيدونا وقتهم وأفكارهم. مش بس كده كمان أخدنا رأي تلات مصممين وبعدين رجعنا نسأل أصحابنا تاني. لحد لما لقينا نفسنا عندنا مجموعة كبيرة من الناس الجميلة، الموهوبة وبالتالي كم كبير من الأفكار المختلفة اللي ممكن ساعات تكون عكس بعض!

اسأل! لكن دايما حط لنفسك مدة محددة تخلص فيها كل مرحلة (مش أكتر من أسبوعين) وادخل في مرحلة جديدة، اللي من خلالها مجموعة صغيرة تاخد القرار … خالي عندك ثقة!

٣.  التغيير مكلف

هتكون في مصاريف مش عامل حسابها علشان كده لازم تفكر في تكاليف البحث، والإبداع، والتنفيذ، والتسويق، الخ. وكمان كم الوقت اللي هيتحط في التجربة دي. خليك فاكر كل حاجة بتتغير من الكروت الشخصية، لليافطة اللى فوق باب المكتب ده غير الورق القانوني، والموقع الجديد! فكر في كل التكاليف دي قبل ما تاخد القرار عشان تكون متأكد إنك تقدر تغطي كل التكلفة.

٤.  يلا بينا … التغيير مش نهاية العالم زي ما إحنا متخيلين

متتمسكش بالماضي زيادة لإنك كده مش هتعرف توصل للمستقبل.

خليك فاكر إنك فكرت في الموضوع ميت مرة وأخدت قرار جماعي إن دي الخطوة الجاية!

الماضي مهم وجميل بس بلاش تخليه يوقف تطورك. خلى تجربتك القديمة في دماغك وحاول تتعلم منها ولكن احتضن التغيير لما إحساسك يقولك إنه ضروري

وأخيرا، والأهم استمتع بالرحلة