دفع وحجز ورشة اﻷدوات التربوية والتعليمية

PRODUCT DESCRIPTION
FAQs
APP

ورشة اﻷدوات التربوية والتعليمية

(اعدادك ﻷداتك هيظبط حياتك)

معهد مكوك العالي هيقدم ورشة ” اﻷدوات التربوية والتعليمية” في اخر شهر نوفمبر ولمدة 3 أسابيع في مقر مكوك

الورشة لتصميم وإنتاج وتطوير اﻷدوات التربوية والتعليمية .. هنتعلم أساسيات تصميم اﻷدوات وازاي نحول المفاهيم العلمية والتربوية والمهارات ﻷدوات عملية تسهل علينا التواصل مع الطفل وتدي تجربة التعلم لذاذة وحماس.

هننتج أدواتنا بنفسنا من خامات بسيطة ونتعرف على الخامات والتقنيات اللى ممكن تساعدنا نطلع أدوات عملية سهلة ولذيذة ..

خلال الورشة كمان هنتأكد أن الأدوات بتؤدي دورها ونحط معايير لجودة الأدوات حسب اللى هايستخدمها والهدف منها

وبناءا على تجربة الأدوات ..هنعرف ازاي ممكن نطورها عشان ناخد احسن نتائج ..

الورشة هتساعدنا على التعامل مع التحديات اللي بتواجهنا سواء فى التربية ..أو التعلم ..أو اكتساب المهارات ..

ها نتعرض لأنواع كتير من الأدوات .. زي أدوات تخطى تحديات التعلم ( لغة – حساب ..) أو أدوات اكتساب المهارات ( ادارة الوقت -الادارة المالية – التخطيط – اتمام المهام – التعامل مع النزاع.. ..) ..

في اخر الورشة كل مشارك هيكون قادر ينتج الأدوات اللي تناسب احتياجاته ..

الورشة لمين

للأمهات واﻷباء اللي عايزين أولادهم يكتشفوا ويتعلموا ويخططوا ويسيطروا على وقتهم وتطورهم
للميسريين والمعلمين اللي مهتمين بتطوير أدواتهم التعليمية
ﻷي حد بيتعامل مع أطفال وبيواجه تحديات في التعلم والتربية
ﻷي حد مهتم يساعد اﻷطفال أنها تمر برحلة تعلم ممتعة وتفاعلية
ﻷي حد بيواجه تحديات في التربية والتعليم ومحتاج ﻷدوات تساعده مش بس نصايح

أهداف الورشة

نتعرف على أدوات غير الشبشب تساعد على حسن السير والسلوك وتنمي الانضباط الذاتي

نعرف مبادئ وأساسيات تحويل أي محتوى لآداة جذابة للي هايستخدمها

نتعرض لأفكار أدوات كتير بتستخدم فى التعلم وفى التربية وتحدياتهم

نجرب نستخدم أى لعب وأدوات وخامات متاحة حوالينا فى التعلم

نكسر حاجز القلق من التنفيذ ونثق فى قدراتنا ونصمم وننفذ بايدينا

نعرف تقنيات متنوعة وخامات متعددة ممكن نستخدمها فى تنفيذ ادواتنا

نصمم وننفذ أدوات ممتعة وتفاعلية وتصب فى الأهداف اللي مركزين عليها وتناسب الطفل اللى اتصممت ليه

نحط معايير لنجاح وجودة الآداة .. ونتأكد أنها حققت الهدف منها ونعرف نطورها

مدة الورشة :

الورشة 6 جلسات على مدار 3 أسابيع من 30 نوفمبر وحتى 18 ديسمبر

أيام اﻷحد واﻷربعاء (الأربعاء 30 نوفمبر, اﻷحد 4 ديسمبر , اﻷربعاء 7 ديسمبر, اﻷحد 11 ديسمبر, اﻷربعاء 14 ديسمبر, اﻷحد 18 ديسمبر)

الوقت: من 10 الصبح ل 2 الضهر فى وقت روقان الصبح قبل هجوم الولاد من مدارسهم

المنهج

الأسبوع الأول: أسبوع الاستكشاف والاستغلال.. هانستكشف طبيعة الطفل ومهاراته فى المراحل المختلفة .. ونحدد التحديات اللى بتواجهنا .. ونعرف أكتر عن الأدوات وأنواعها .. ونجرب نستغل أي حاجه حوالينا كآداة للتعلم.

الأسبوع الثاني: أسبوع التصميم و الخامات والتقنيات .. هانشوف كل هدف يناسبه أى تقنية وكل تقنية يناسبها أي خامة ونشتغل بقى ونطلع أدوات من تصميمنا.

الأسبوع الثالث: أسبوع الجودة و التطوير.. هانعرف ازاي نتأكد من جودة الأداة .. وفاعليتها .. ونطور أدواتنا بعد التجربة .

التكلفة

تكلفة الورشة ٢٥٠٠ جنيه شاملة الضرائب والأدوات والمواد التعليمية.

عن الميسر

ندى شريت

أم وعضو هيئة تدريس فى جامعة أسيوط ( تخصص تصميم – تربية فنية ) .. وميسرة ومصممة ألعاب ومناهج وأنشطة .. موضوع رسالتها فى الدكتوراه هو مواصفات تصميم ألعاب تساعد على ملاحظة مستوى مهارة الطفل باستخدام المقاييس التشخيصية …وبعدها اشتغلت على عدة أبحاث فى علاقة اللعب بالمهارات والتعلم …ندى مهتمه جدا بالفنون والطفولة واللعب والتربية والتعلم والتصميم وعلم النفس وهما دول مجالات دراساتها المتنوعة ( اللى فات واللى لسه جاي ..ما التعلم مابيخلصش)..

.. ودايما بتحب تعمل منهم كومبو وبتسعى تطلع تركيبه من جمال الفنون ومتعة اللعب و راحة النفس وتطور الشخصية .. بتستمتع بتحويل أي محتوى للعبة أو تجربة ممتعة .. و بتعافر عشان يكون عندنا جيل مستقل ومعتمد على نفسه وسعيد ومنتج وبيحب يكتشف ويجرب …. ونفسها أن التعلم والتطور يكون مصدر للسعاد’ والبهجة بدل ما يرتبط بالكبت والكآبة .