بلدنا – لعبة بتتطور

طول الوقت بنحاول من خلال صناعة الألعاب في مصر إننا نكتشف مساحات وطرق جديدة للعب. دلوقتي، وبعد مرور أربع سنين على أول نسخة من لعبة بلدنا، وسنتين على تاني نسخة، شغالين على النسخة التالتة!

 

النسخة الجديدة نتيجة تجارب وتطوير في فكرة لعبة عن مصر. طريقة اللعب متغيرتش كتير، اللعبة لسه بتاخدك في رحلة حوالين مصر من خلال الإجابة على أسئلة وعمل مهام مختلفة، وأول فرقة تخلص رحلتها تكسب.

 

في ٢٠١٤، بدأنا حملة تمويل جماعي دعمنا من خلالها اكتر من ١٢٠ شخص، وده ساعدنا اننا نوصل للمكان اللي احنا فيه. اكيد بتسأل، طب لو كل حاجة حلوة كدة نعمل نسخة جديدة ليه؟  أساسا عشان نحسن منها (منطقي صح؟)، بالذات عشان نطور التصميم وطريقة اللعب والتصنيع.

 

كنا محظوظين اننا قبلنا نور ورمضانة اللي اشتغلوا معنا على اللعبة. لإننا في المرة الأولى ماكانش عندنا القدرة ندفع لمصمم، ووليد طاهر اتبرع بمعظم وقته للشغل على الرسومات، فاضطرينا نستخدم قدراتنا المحدودة ونعمل التصميم بنفسنا. وبالتالي المرة دي شكل اللعبة هيكون أحلى.

 

كمان في تغيير في طريقة اللعب، أولا الدور هيكون أقصر وشلنا نوعين من أنواع الأسئلة الخمسة. وثانيا، دور كروت “يالا” بقى أكبر في اللعبة.

 

وأخيرا، خلال السنين اللي فاتت اتعلمنا حاجات كتير لها علاقة بالتصنيع. فالمرة دي القطع والخريطة وكمان العلبة مظبوطين أكتر، والأهم إنهم أخف فبالتالي تكاليف الشحن هتكون أقل وبكده اللعبة هتكون متاحة لناس أكتر عايشين بره مصر (ودول كتير اوى اليومين دول).

 

نسيت أقول معلومة مهمة جدا، أول ما النسخة الجديدة تنزل هنبدأ ننزل إضافات، زي أسئلة جديدة وطرق مختلفة للعب وأي حاجة عاوزين نزودها عشان تقدر تخلي تجربة لعبك على مزاجك وعمرك ما تزهق من إنك تلعب اللعبة كل مرة بنفس الطريقة.

 

في حاجات تانية هتتغير في اللعبة بس مش هينفع أحكيها كلها هنا، عشان كده اشترك في نشرتنا عشان توصلك أخبارنا وتعرف اول ما بلدنا الجديدة تنزل.